Арьсаа хамгаалах нь

Зун болдоггүй ээ. Америкт онгоц нисэхээ больтол нар шарж, Оросын Европ талдаа кондиционер нь эвдэртлээ халж байна гэж мэдээгээр гараал байх юм. Улаанбаатарт байдаггүй шүү. Дулаарч шалиагүй буудал нар буцав. Наадмын маргааш намар гэж…

Энэ бичлэгийн гол сэдэв нь зунтай холбоотой. Хоёр жилийн өмнөөс ВВ крээм гээч нарнаас хамгаалагчтай, будаг шунхтай, чийгшүүлэгч тос дэлхийг байлдан дагуулав. Солонгосууд анх гаргаж ирсэн болохоор манайд ч гялс нэвтэрсэн. БиБи крээмтэйгээ энэ зуныг авна даа гэж төлөвлөж байтал юу вэ, цаана чинь СиСи крээм гээд гарч, би ч дагаж шуураад худалдаж авсан юм. Ерөнхийдөө тэрхүү СиСи крээм нь бол өмнөхийнхөө сайжруулж, хөнгөхөн болгосон хувилбар юм байна.

Анх өнгө оруулсан чийгшүүлэгч буюу Tinted Moisturizer дээр нарны хамгаалалт, антиоксидант гм арьсанд хэрэгтэй зүйл нэмж хийснээр ВВ крээм үүссэн юм байна.Ерөнхийдөө аль брэндээс хамаараад янз бүрийн үйлчилгээтэй байдаг. Арьс өнгөлөхийн хувьд суурь крээмнээс арай хөнгөн боловч,ТМ-с илүү өө дардаг үндсэн шинж чанартай. 

СС крээм нь болохоор Color Correcting гэдгийн товчилсон үг бөгөөд ВВгээ бодвол илүү хөнгөн, мусс шиг гэхдээ арьсны улайлт, цонхигор цагаан, шар өнгийг илүү амьд болгодог. 

Миний туршилтаар онцын ялгаа үгүй мэт боловч тухайн брэндээсээ хамаараад ВВ нь илүү ази царайнд, СС нь шар арьстнуудад таарах бололтой юм. Нүүрний арьсныхаа хэрэгцээнд тохируулаад сонгоход Аllure харьцуулж бичсэн байна лээ. Миний хувьд нар шарсан өдөр ССдээд, бусад үед нь ВВдээд энэ зуныг авна даа. Гэхдээ ЗУН болвол шүү дээ

 

Саваагүй нохой саранд хуцнаа. Хов-хов-хов

Ойрд Ерөнхийлөгчид нэр дэвшигчдийн мөрийн хөтөлбөр уншиж байна. Күэй, нээрээ, би уншаад уншаад ойлгохгүй байгаа юм. Манай Ерөнхийлөгч чинь нийгмийн хөгжлийн асуудлаар гол шийдвэр гаргагч байсан юм байна лээ ш дээ. Бүдүүлэг, харанхуй би нь болохоор “Ард түмний эв нэгдлийн бэлгэ тэмдэг” төдий л бодож явж. Миний тэгж бодох болсон шалтгаан нь: УИХ-ын тогтоолд хориг тавьдаг ч тэрийг нь нөгөөдүүл нь түй тоож үздэггүй, УИХ нээлт, хаалтын чуулган дээр гишүүдийг өрөөлийн, өөрийн хамаагүй загначихдаг, Цагаан сараар хамгийн дээр суудаг, гадаад элчин сайд, шүүгчдийг томилох шийдвэрийг соёрхдог байсан өмнөх дүр зурагтай холбоотой.

Сонгуулийн стратегийг нь харахаар АН авлигаа яриал байвал сонгогдчихно. МАН нь хүчний харьцааг тэнцвэржүүлэхэд тустай, МАХН болохоор 2 нам ямар ч ялгаагүй гэдэг мессэжтэйгээр үзэж байх шиг байгаа юм. Яахав болж л байна. Ганцхан нэр дэвшигч хувь хүн дээрээ очихоороо л болохоо больчихоод байнаа.

АН-г харахаар аваргаа дэмжмээр, эмэгтэйг нь бодохоор Удвалаа дэмжмээр, ярьж хэлж буйг нь харахаар Ерөнхиийлөгчөө дэмжмээр. Ёстой сонголтгүй сонгууль юмаа. Үзэл баримтлал, агуулга, утга нь зөрчихөөр сонголт хийхэд хэцүү байдаг юм байна. Холимог хуурга, бантан гэдэг л энэ байх даа.

Сөрөг сурталчилгаа харж байхад залуучууд сайхан сэтгэх юмаа. Энэхүү бүтээлч сэтгэлгээг хэрэгтэй зүйлд зарцуулбал бид ч дорхноо л хөгжинө дөө. Би хувьдаа аваргын цэвэр гарыг Дэлхий нийтийн гар угаах өдөр 10сарын 15-ны уриа болгож, аваргыг цэвэр гарны элчээр томилох санал ЭМЯ-нд гаргана гэж бодож байгаа. Реклам, роликт мөнгө зарахгүй, төсөв хэмнэнэ. Халдварт өвчин буурахад тустай. ККК

Хэн хэнийг дэмжиж байгаа нь хамаагүй бүгд саналаа өгөх нь чухал. Хоёр үе шаттай болчихвол бөөн зардал. Дахиал нэг хэсэг сонгуулийн шоу тасрахгүй. Цаана чинь хямрал айсуй…

 

 

 

Эв нэгдлийн тухай

Монголд сонгуулийн өмнөх халуурал дээд цэгтээ хүрч байна дөө. Уг нь аминдаа энэ халуурлаас хол байхыг хичээж байгаа боловч мэдрэл, няарванд нөлөөлж байнөө үнэндээ. Хаана ч явсан Элбэгээгийн мөнгөөр зодсон том том баннер, Бат-Эрдэнэ аваргын гонжтой зураг байна. Н.Удвал хаяа гм. Хэсгийн сонгуулийн шатаавын байр нь гэхэд л аварга дэлгүүр, эмийн сангийн нэг тал, Эби 1-р давхрын айлын байр, Удвал аниа орон сууцны подвал гм. Бэл бэнчин, зэрэг зиндаагаа харуулчих юм байна дөө.

Угаасаа сонголт үгүй сонгууль хийх гэж байгаа улс, чаддаг чаддаг, мэддэг мэддэгээрээ л саналаа өгцгөөх биз. Мэтгэлцээний дүнд саналын өөрчлөлт 6-с илүү  % гарахгүй гэж тооцоолж байна. Гэхдээ хэн мэдлээ. Өмнөх сонгууль шиг ганц уйлаал эргүүлээд хаячих боломжтой. Савалгааны гол учир нь саналаа өгдөггүй сонгогчдын тоо жилээс жилд нэмэгдэж байгаатай холбоотой.

Энэ жил санал өгвөл 1000 нэгж ч гэх шиг, санал хураалтад оролцдогоороо Гиннесийн амжилт тогтооё ч гэх шиг балайрч өгөх юмаа. Санал өгөхгүй иргэдийн тоо олон байвал  Элбэгдорж ялах магадлал өндөр. Хүмүүс идэвхитэй оролцвол хоёрдахь шат гарна. Энэ хэрээрээ мөнгө урсана. Сонгуульд оролцох урилга ч гэх шиг балай юм хэвлээд тарааж байна. Хайран ч мөнгө.Урилгатай урилгагүй Сонгогчийн үнэмлэх байхад л хангалттай баймаар.

МАН ПиАрчдын багийн яруу найрагч, сэтгүүлч нар уянгын халилыг нь ихдүүлээд алж байнаа. Гангнам стайль бүжиглүүлж, нулимстай дуу дуулуулаа. Бүүр цэвэр цусны монгол гэж балайраад юу вэ? Монгол Улс нэгдсэн улс!

Элбэгээгийнхэн сурталчилгаа илүү шинжлэх ухааны үндэслэлтэй байна. Би хүртэл шөнө зүүдэлж байна ш дээ.ККК. Боловсролтой мэдээлэлтэй иргэд сонголтоо хийчихсэн учир тэдний санал тогтсон. Савалгаатай хэсэг дээрээ л тогтож ажиллан авлигыг цээрлүүлж байгаагаа үргэлжлүүлэн ярихад л хангалттай юм. Олуулаа болно урианы биелэлтийн үзүүлэлт болгож, Мөнхбаярыг чирч авчраад яаж байгаа юм бэ?

Удвал гуайн хувьд улстөрийн хэлмэгдүүлэлт гэж ярихгүй шиг эхийн хайраа яриал явбал эмэгтэйчүүдийн саналыг зулгаачихна шүү дээ. УИХ дахь Эмэгтэйчүүдийн бүлэг энэ хүнийг дэмжиж огт хөдөлсөнгүй. Ядаж Г. Уянга нь ганц нийтлэл бичсэнгүй, С.Баянсэлэнгэ нь түй ч дуугарсангүй. Улстөр дэх эмэгтэйчүүдийн оролцоо гэж бахирдаг эмэгтэйчүүд бүүр таг шүү. Би энэ эмэгтэйг хүндэлж байгаа. Н.Энхбаярт “дурласан” байж болно, гэхдээ л чадна гээд үзэл бодлынхоо төлөө дэвшээд гараад ирнэ гэдэг зоригтой байна. Элбэгээг хор найруулж ЕС хийж явахад, Ба аваргыг улсын наадамдаа тасралтгүй түрүүлж байхад энэ эмэгтэй Англид магистр хамгаалж байсныг мэдэх юм. Ер нь вол ФЕМИНИЗМ эмэгтэйчүүд бие биенээ дэмждэг, хайрладаг болсон цагт л ялна гэж байгаа.

Хэн нэгэн нэр дэвшигчийг дэмжих, үгүйдээ биш, саналаа идэвхитэй өгөөрэй. Ядаж сонгуульд зарцуулах мөнгө хэмнэхэд хувь нэмрээ оруулъя. Цаана чинь хямрал айсуй…

 

Жич: Батжаргал сайхан биччихэж 

Хөдөөгийн байдал шальдар бульдар буюу ЭРЭМБЭ

Хөвсгөл аймгаар явж, хамаатан садныхаараа айлчлав. 

Малчны хот айл Төмөрбулаг, Бүрэнтогтох сум

Хөвсгөл аймгийн өмнөд сумдаар газрын гарц муу, сааль сүүндээ ч хүрээгүй, хар цайтай байна. Хүйтэн салхитай сэрүүн байгаа болохоор ямаагаа самнасан ч ноосоо аваагүй байна даа. Өвөл хүйтэн, цастай байсан тул мал жилбэ муутай төллөсөн, сүүндээ цадаагүй төл, ногоонд цадаагүй мал. 

Гол горхи олноор ширгэж, амьдрах нутаг бэлчээр нь улам л хумигдаж байгаа тухай ярина. Томхон хүүхдүүд нь УБт сургуульд явсан, дунд сургуулийнхан аймгийн төвд  гэр барьж өгсөн тухай хуучлав. Бага охиноо ирэх жил сургуульд орохоор эхнэр нь дагаж төв орж, нөхөр нь малтайгаа үлдэх санаатай гэнэ.

10, 20 жилийн өмнөхөөс өөрчлөгджээ. Нарны зайтай, D-Dish-ээр ТВ үзчихнэ. Ерөнхийлөгчийн сонгуулийн сурталчилгааны материал хүрчихсэн байна лээ. ККК

Улирлын чанартай орлого ноолуур, махаа зарж борлуулах хооронд хүүхдийн мөнгөөр ойр зуурын хэрэгцээгээ хангана. Малаа барсан хүмүүс нь төв орно.

Ерөнхий дүр зураг 1990-ээд оны дунд үе. Байгаа мөнгөө өрхийн хэрэглээндээ зарцуулаад дуусдаг, амиа аргацаасан аж ахуйн системтэй. Улирлын чанартай орлого нь төв суурин газарт сургалтын төлбөр болж шилжинэ.Аж ахуйгаа өргөжүүлэх, сайжруулах боломж хомс.

Сумын төв: Тариалан, Тосонцэнгэл 

Тариалн сумын хувьд газар тариалангийн бүс нутаг болоод ч тэр үү айлууд хашаандаа жимс, жимсгэнэ, хүнсний ногоо тариалсан байв. Мөн гахай, тахиа гэх мэт амьтан тэжээдэг юм байна.Сумын төвд ажил хомс. Цэрэгт явсан хүүхдүүд нь УБт барилга дээр ажилладаг гэнэ. Хүүхдүүд нь УБт сургуульд сурдаг, ажилладаг айл олон. Сумын төвийн эдийн засгийг 2-3 гэр бүл атгадаг юм байна. Дэлгүүр ажиллуулдаг айл өрхүүд ямар нэг байдлаар бие биетэйгээ холбоотой байдаг бололтой.

Цагаан сараар нэг сар амарсан болохоор хүүхдүүдийн амралт эхлээгүй байлаа. Халуун салхитай өдөр цүнхээ үүрсэн хөөрхөн хүүхдүүд олон тааралдаж байв. Хог, шороо ихтэй. УБ-ын 90ээд оны сүүл, 2000 он хавьд нийгэм, эдийн засгийн хөгжлийн түвшин нь байна

Аймгийн төв

Их өргөжжээ. Хангай нутаг болохоор бүгд л дүнзэн байшинтай. Шугам сүлжээтэй хэсэгт нь аль хэзээ хувийн байшингууд баригджээ. Хамгийн хөгийн нь дунд сургууль барих ёстой байсан газарт нь хаус хороолол боссон тул голын эрэг дээр шинэ сургууль барьсан байна. Анх 1200 хүүхэдтэй байснаа одоо 900 болж буурсан гэнэ. Аргагүй шүү дээ, хэн балчир үрээ өвлийн хүйтэнд жавар сөргүүлж, хичээлд нь явуулахыг бодох билээ.Авлигын хар сүүдэр. 6, 7 настай жаахан юмнууд -30С градуст цүнхээ үүрээд 15-30 минут алхаж хүрэхээр газар байна 

Аймгийн төвийн машин унаа хэт олон байна. Уулзвар дээр түгжрэл үүсэх хэмжээнд хүрсэн гээд төсөөл дөө. Аймгийн төвд газар олгож дуусаад зэргэлдээ сумдын газар нутагт оржээ. Яг одоо эдгээр асуудлыг бодлого,төлөвлөгөөтэй хянахгүй бол 5 жилийн дараа гэхэд УБ шиг л болох нь. Ерөнхийдөө аймгийн төвийн хөгжил 2000 оны дунд үеийн УБыг санагдуулахаар байна. Шугам сүлжээ орсон төв хэсэгтээ нүх сүв үлдээлгүй хашаа хатгаж, суурь ухсан байв. Газрын төлөөх дайнд бүгд гарчээ.

Аймгийн эдийн засаг, мөнгөний урсгалын ихэнхи нь 4-5 гэр бүлийн гарт байна. Талх, нарийн боовны хэдэн хөөрхөн үйлдвэр байхаас гадна хэд хэдэн сум цай үйлдвэрлэдэг болжээ. Хамгийн сонирхолтой нь зэрлэг жимсний чанамал УБ-аас үнэтэй байв.

Гүний худгийн литр ус 1төгрөг. Модоо усалдаг болсны дүнд сайхан ногоорчээ. Зам, нийтийн эзэмшлийн талбайн цэвэрлэгээ сайн юм. Гэрэлтүүлгээ замынхаа нэг талд хооронд нь их ойрхон байрлуулсан байв. Яагаад ийм төлөвлөлт хийснийг ойлгосонгүй. Гудамжны хаягжууллт маш сайн тул айл олоход маш хялбар. Ард нийтийн амьдрал ерөнхийдөө сайжирчээ. Хүн амын төвлөрлөөс болоод эмнэлэг,цэцэрлэг, сургууль нь ачааллаа дийлэхгүй байгаа гэнэ.

Шугам сүлжээ шинээр тавигдаагүй тул хуучин байсан барилгуудаа хажуу тийш нь татаж өргөтгөл хийж байгаагаас орон зайн төлөвлөлт алдагдаж эхэлж байгаа юм байна. Одоогоор арай ч сургууль, цэцэрлэгийн талбай руугаа дайраад орчихоогүй, хуучин юу ч байдаггүй байсан хоосон газраа чигжиж байгаа бололтой. Хэрэв одоо л төлөвлөлтдөө анхаарахгүй бол удахгүй УБ шиг нийтийн барилга байгууламжийн талбайдаа барилга барьж эхлэх биз. Аймгийн музэйн хашаа гэхэд хуучин зоопарк байгуулж байсан том талбайтай, хашааны араар нь 5 давхар орон сууцны барилга хоёрыг бариад, шинээр суурь цутгахаар ухсан харагдана лээ. Гэр хорооллын хашаанууд нь эмх цэгцтэй тул бохир, цэвэр усны шугам оруулчих л юм бол 10 жилийн дараа дахин төлөвлөлт хийнэ гэх УБ-ын зовлон тохиохгүй юм гэж санагдав. Ер нь УБ-ын асуудлаас сургамж авч, аймгийн төв, сум суурин газрын төлөвлөлтөө хийж, сайтар барихгүй бол эрх мэдэлд хүрсэн хүмүүсийн ёс жудагт найдах нь өвлийн хүйтэнд яргуй ургуулахтай ижил дэмий хоосон мөрөөдөл гэдгийг өнгөрсөн 15 жилд бид хангалттай сайн ойлгосон гэж найдаж байна.

PS: УБ-ын иргэний хувьд хөдөөгийн амьдрал миний нүдэнд ингэж тусч байна. Тэгвэл хөгжсөн орны иргэний нүдэнд Монгол Улс маань тэдний өнгөрсөн түүхийг харагдуулдаг тул тэд ирээдүйд үр ашгаа өгөх боломжийг биднээс түрүүлж олж харж чаддаг бөлгөө. Суурин иргэншилдээ хэдэн зуун жил хөгжиж ирсэн оронтой суурьших гэж ядаж буй бидний монголчууд “чөлөөт зах зээл” дээр өрсөлдөж байна. Бид чадах уу? Амжих уу?!