Баян хоосны ялгаа

Би үнэнчээр хөдөлмөрлөж, хүмүүст тустай бараа бүтээгдэхүүн, үйлчилгээ үйлдвэрлэн дэвжиж буй шинэ үеийн хөрөнгөтнүүдийг дэмждэг. Харин “Чадаж байгаа бол арга байхгүй” гэдэг афоризмээр дөрөөлөн өөрийн албан тушаал, ах, дүү, хамаатан садныхаа сүлжээг ашиглан зүй бусаар хөрөнгөжиж буй хүмүүст зэвүү, дургүй хоёр зэрэг зэрэг хүрч байна.

Мөнгө хүүлэгчид:

Үндэсний валютаа америк доллартай уясан олборлогч эдийн засагт Фридманы мөнгөний бодлогоор эдийн засгаа удирдах онол яаж хэрэгжиж байна вэ? Манай мундаг эдийн засагчид энэ талаар ярьсан, бичсэн байхыг би олж хараагүй. УИХ-ын гишүүн Амаржаргал гуайн ярилцлагаас харахад нэгэн цагт ЕС хийж, ачааны хүндийг үүрч явсан энэ хүн мэддэг ойлгодог гэж бодогддог.

Тэгээд яагаад баян нь баяжаад, ядуу нь улам ядуураад 90-ээд онд хүн амын 30 хувь хүрч байсан дундаж давхарга хоёр дахин багасав? Ойлгомжтой байх үүднээс жишээ авъя.

ХХБ-аас орон сууцны барилга барихаар 2 тэрбум төгрөг 2006 онд 5 жилийн хугацаатай авсан гэж төсөөлье.Банкны хүү жилийн 14-16 хувь. Ам. долларын ханш 1120.

2011 оны сүүлээр зээлээ эргүүлэн төлөхөд ханш 1390. Өсөлт нь 270 төгрөг буюу 24 хувь. Авилгын арван хувиа банкны хүүтэйгээ зөвхөн ханшийн зөрүүгээрээ дараад орон сууц борлуулсан үнэнээсээ ашгаа хийчихэж байгаа биз?

Тооцооны задаргаа:

Эхний хөрөнгө оруулалт нь 2 тэрбум төгрөг.

Барилгын төсөл 9 давхар 120 айлын сууц нийт талбай ойролцоогоор 8 мянган метр квадрат барилга. Үүнээс ашиглах талбай 7.2 мянган м.2в

1 м2 төсөвт өртөг 280 мянган төгрөг. Нийт төсөвт өртөг 2,24 тэрбум төгрөг. Борлуулах үнэ 1 м.2 тухайн үед 380-450 мянган төгрөг байсан. Борлуулалтаас орж ирэх орлого. 7.2мянХ МНТ410 мян =2.9 тэрбум.Үүний гучин хувийг урьдчилгаа төлбөр болгон захиалагчдаас авахад 870 сая.

Барилгын захиалагч: 2005-2006 онд 2.87 тэрбум төгрөгөөр хөрөнгө босгож байшин барьсан захиалагч нь санхүүгийн бага хэмжээний эрсдэл хүлээж, эрх зүйн ямарч хариуцлага хүлээхгүйгээр мөнгө хийнэ.

Гүйцэтгэгч компанийн хувьд ашгийн 15 хувиа хийгээд хүмүүсээ ажилтай байлгалаа. Захиалагчийн шахсан материалыг алдчихгүй манаад зураг төслөөс нь зөрүүлчихгүй шиг хөдөлмөр хамгааллаа бариад байшингаа барих үүрэг хүлээлээ. Цутгамал бетоны бэхжилт 72 цаг бол 24 болгон товчилж, шахааны чанаргүй материалаар 18-24 сарын дотор төсөл хэрэгжүүлэв. Борлуулалтын асуудал захиалагчийн ажил.

Барилгын захиалагч, гүйцэтгэгч, худалдан авагчдаас хамгийн өндөр эрсдэл хүлээгч нь орон сууцны зээл авсан ХУДАЛДАН АВАГЧ. Яагаад гэвэл газрын зөвшөөрөл авсан барилгын захиалагч нэгж лицензээ олон өмчлөгчид тарааж өгснөөр төр, иргэний хооронд хамгийн хэцүү эрх зүйн харилцаа үүсч байгаа юм. 0.7 га газартаа байшин барьчихаад өндөр орон сууц бариад 120 өрхөд өмчлүүлчихдэг. Эцсийн худалдан авагч энэхүү бүх санхүү, авилгын сүлжээнд бий болсон ашгийг үүрдэг юм.