Унаа тээврийн хөгжил дэвшил миний амьдралд

Хөгшин аав, ээжийндээ зун томилолтоор “ажилладаг” байсан 4-5 настай байхдаа ердийн хөсгөөр сайхан зорчдог байжээ. Цагаан голдуу хэдэн үнээндээ өвс хадлан авах кампаант ажил өрнөхөд хярам, цай дөхүүлэх, цэцэг түүх, эрвээхэй хөөх гэх мэтээр ах нартаа маш их “тусалдаг” охин байлаа. Өвс ачсан тэргэн дээр биш, тэргэнд хөллөсөн үхэрний нуруун дээр суугаад явж байснаа тод санадаг. Хүрэн хайнагийн шарны эвэр нь хоёр тийшээ далбилзаад, хэрэв уначихвал сүлбэчихээр аймаар санагдсан тул тэгж их тод үлдсэн байх. Бас хөлөө жийхээр явдаг тод улаан машинтай байсан нь нэг жил томилолтоос ирсэн байхгүй болчихсон байсан. Бодоход эвдэрсэн, эсхүл хамаатны хүүхдүүдэд өгсөн байх. Эхлээд улаан Ява, дараа нь цэнхэр Иж Планета мотоцикэлний бензины саван дээр нь суудаг байснаа, суга “дэвшиж” аавын хойгуур нь суудаг болсноо хүмүүст хотгойд аялгаар гайхуулан ярьж онигоонд орж байсан юм даг. Хотгойдууд хэлний угийн г авиаг дундуур, мөн үгийн төгсгөлийн хос эгшгийг урт эгшгээр дууддаг. Хойгуур-хөөгүүр, могой- могоо г.м.

Дараа нь манайх хувийн машинтай болж, сургуульдаа хүргүүлэхдээ их ичдэг байж билээ. Зам дээр буугаад алхачихъя гэхээр аав заавал сургуулийн хашааны үүдэнд буулгаж өгдөг байсансан. Ажилтай аав намайг үргэлж хүргэж өгнө гэж юу байхав, ихэнхидээ явган, шугамын автобус ирж таарвал нийтийн тээврээр гээд л 10 жилийг үдэв.

Оюутан байхдаа шуудан хүргэгчийг тосон гүйгээд гэдэг шиг 8 номерын трамвай, 10 номерын троллейбусыг тосон гүйсээр, өвөл, зуны амралтаараа гэр рүүгээ тэмцэхдээ долоо хоног поездонд сэгсчүүлсээр өнгөрсөн байх юм. Тодорхой тооны хүмүүсийг вакумжсан нэг системд оруулчилхаар юу эс тохиолдохов. Дан залуу хүмүүс дуулна, хуурдана, хөзөрдөнө, нуугдаж тоглоно, вагон хурдлуулна, дурлана хайрлана. Их л хөгжилтэй байсан сан. Сүүлд наймааны ид үеэр бол үхтэл панз үсэргээл нөгөө их удаан хоног чинь дороо л өнгөрдөг болж билээ.

Баруун Европ руу хөл тавьсан цагаас эхлэн янзан бүрийн авиа компанийн онгоцонд суусан байна. Аэрофлотоор нисэхэд нээх хүйтэн, бараг хөлдүү тахиа, Миат болохоор  дан хиаман зууш өгдөг байж, аль алийг нь идэж чаддаггүй байсан сан. Эйр Чайна, ЖАЛ-ын хоол ёстой таалагдаагүй. Тийм болохоор хоол сайтай авиа компаниудад би их хайртай. Кореан Эйр болохоор Монгол руу мяа онгоц, гадаад руу гоё онгоц явуулдаг, Малайжиан Эйрлайнс суудалнууд нь Солонгын долоон өнгөтэй, Тай Эйрвэйс хүүхнүүд турьхан нарийхан байж шуналт миний 10кг цүнхийг СҮП гээл өргөөд дээш нь хийчихдэг, Лютфханза, Бритиш Эйрвэйс зай талбай ихтэй, ялангуяа суудал хоорондын зай хол, өндөр тул би мэтийн намханчууд хөл газарт хүрэхгүй, гэхдээ хоёр сандал дамнаад элбэг сайхан багтаад унтчихаар. Манай МИАТаар нисч байгаа гадаадууд бол үнэн өрөвдмөөр. Суудлын тоогоо нэмэх гээд сандлаа шахчихсан. Хөөрхий амьтад “өвдөг тохой хамт” байрлалтай. 

Австралийн үндэсний компани Кантас болохоор аюулгүй ажиллагаагаар дэлхийд тэргүүлдэг. Борооны хүн гээд кинон дээр гардаг даа, Дастин Хофман “би Кантасаар ниснэ, яагаад гэвэл түүхэндээ онгоцны сүйрэл болж байгаагүй цорын ганц компани” гээл хөөрхий Том Крузыг “шар махтай нь хатаадаг”. Барууны онгоцны компани нас харгалзахгүйгээр ажилд авдаг учраас хижээл насны стюардессүүд олонтой. Манай дүү Солонгосоос Кантасаар ирээд хөгшин үйлчлэгч нартай аягүй сонин гээл гайхаад байсан. Нэгэнт хүнийг нас, хүйсээр нь ялгах хориотой тулд бүгдэд ижил боломж олгодог. 

Этихад, Эмиратс г.м баян орны авиакомпанийн онгоц нь гоё гэж юу гэхэв. Үйлчлэгч нар нь бол бүүр тасарчихсан, гөлийтлөө ширтсээр байгаал буусийш дээ. Онгоцны хоол, үйлчлэгчийн хувцас бүгд ямар нэг байдлаар эзэн орныхоо зан заншил, соёлыг илэрхийлдэг бөгөөд алдартай дизайнерууд хувцасны загварыг гаргаж, маш сайн материалаар хийгдсэн байдаг юм билээ. Эмиратс гэхэд элсэн шаргал өнгөтэй хослол дээр улаан тоорцгон малгай тавьж, лалын шашны ёсны дагуу цагаан торгон алчуураар үсээ далдалсан байдаг. Хоол хүнсний хувьд шингэц сайтай боловч шаардлагатай илчлэгийг хангах, дээр нь амттай хоолоор үйлчлэхийн тулд мундаг тогооч нар, хоол тэжээлийн мэргэжилтэн, химич технологич гээд олон хүний хөдөлмөр шингэсэн хамтын бүтээл. Хүнсний аюулгүй байдлыг дээдийн дээд зэрэг хангана. Манай МИАТ хөх өнгө голлодог. Найз эмэгтэй МИАТ-ын үйлчлэгч, олон улсад нисдэг. Агаарын даралтын зөрөөнд байнга ордог, их хэцүү ажил. Гаднаас нь харахад л гоё сайхан хүүхнүүд гүйлдээд байдаг боловч тэдний хөдөлмөр уурхайчны хөдөлмөртэй ижил түвшинд үнэлэгддэг юм байна лээ. Нэг удаа УБ-д агаар муугаас Москвагаас шууд Бээжинд бууж хонохдоо “үгээ хэлсэн”  биш найзынхаа хөдөлмөрийг их үнэлж, бас бахархаж явдаг юм.

Байнга үйлчлүүлдэг компани гэвэл Сингапур Эйрлайнс. Хямд хуванцар хоолны хэрэглэл биш, үнэтэй гоё набор өгөхөөс гадна хоолоо менюнээс сонгоно. Тэгээл сүүлийн үед гарсан киног ёстой нэг заналтай сайхан үзнэ шүү дээ. 10 кино гэдэг чинь зуун хэдэн дойлуур. Нуль хэмнэлт… Залхуурахгүй бол зад компьютер тоглоом тоглоом, хөлгийн ахмадын харж байгаа өнцгөөс газар дэлхийгээ тольдоол … Үйлчилгээ бол тасарсан. Бизнес классаар нисвэл сандал нь сансрын хөлгийн бүхээг шиг лаг гоё ор болдог. Анхны жумбо Эйрбус 380-ыг Сингапур Эйрлайнс Нью Йоркын нислэгтээ явуулсан. Үнэн тансаг, бүүр коктейль баартай гээл бодоорой.  Дуртай гар чинь найдлагатай үйлчлүүлэгч гэсэн пайз аваад буусий ш дээ. ;). Тэрнээс гурав хоногийн дараа Цонжин болдогт тэмээн тэрэг унаал явжээж билээ. Үнэн уйтгартай, нэг хэмээр… Тэгээд 13-р зуунд Алунгоо эхээс авахуулаад  мухлаг тэргэнд суусан хүүхнүүд булаалгахдаа үнэн  дуртай байсан гэсэн дүгнэлт хийсийш дээ. Ийм тийшээ горьдлого царайлж хараал…  

Та нар Алимаа одоо гэнэт яагаал тэмээн тэрэг, онгоц, мотоцикол яриад унав гэж гайхаж байна уу, айн?Яасан гэхээр би энэ 3 дахь өдөр УБ явах гэж байгаан. Тэгсэн Чилид дэлбэрсэн галт уулын үнс нь энэ хавиар ирчээд нислэг саатуулаад байна. Өнгөрсөн долоо хоногжингоо  тэгсэн чинь маргааш дахиад нислэгүүд цуцлагдчиж. Гурав дахь өдөр гэхэд салхи сайн үлээгээд өгөөсэй, тэгвэл би тав дахь гэхэд гэртээ харьчихсан, Их Монгол хавиар явжаах байх шүү. ККК

Маргаантай үгс

Монгол хэлний зөв бичгийн дүрмийн маргаантай 500 үгийг нэг мөр болгосон гэнэ. Заримыг нь буруу бичдэг л юм байна. Сураад авий даа.

http://news.gogo.mn/r/8938

АНУ-д суралцахыг хүсэгчдэд БАКАЛАВР

Билгүүн блог дээрээ ийм зар тавьсан байна. Сонирхоод үзээрэй.

http://bilguunu.blogspot.com/2011/06/best-university-opportunity-program.html

Болох болохгүйн хязгаар

МCS компанид ажлын урилга авсан нэгэн татгалзсан хариу өгснийг сонсоод учрыг лавлатал “Хүүхдийн паркыг устгасан, УБ-ын өнгөтэй өөдтэй бүхнийг эзэмшсэн компанид ажиллахгүй” гэсэн хариулт сонсоод бахархах сэтгэл төрлөө. Үнэхээр л хууль зөрчөөгүй бүхэн зөв шударга зүйл мөн үү?

Авилгачин, газрын наймаачдыг жигшин зэвүүцдэг мөртлөө Зайсангийн ам, Туулын эрэгт барьсан байшин худалдан авч орох нь хэр зэрэг зөв зүйл вэ? Хэдийгээр чи авилга аваагүй, орон сууцаа банкны зээлээр авсан ч гэсэн анхнаасаа Монгол Улсын хүчин төгөлдөр хууль тогтоомжийг зөрчин байж баригдсан барилгыг худалдан авч байнаа гэдэг чинь энэхүү хууль зөрчсөн үйлдлийг дам дэмжиж байна гэсэн үг. Нэгэнт барьсан байшин нь зарагдаад байгаа учраас газрын үнэ тэнгэрт гарч, эрх мэдэлтнүүд гарын үсгээ хууль бус орлогын эх үүсвэр болгон хувиргаад, тэрхүү эрх мэдлийн төлөө улайран дайрч байна. 

Билл Клинтон, Моника Луинскигийн хэрэг явдлын дуулианы үед Клинтон худал хэлсэн эсэх талаар Конгресс дээр хэлэлцэхэд Ерөнхийлөгчийн талын өгч байсан тайлбар “Хууль зөрчөөгүй боловч зөв биш үйлдэл”-ийг ойлгоход их тустай. АНУ-д гэр бүлээс гадуур бэлгийн харилцаатай байхыг хуулинд хориглодоггүй тул Клинтон хууль зөрчөөгүй. Харин “I did not have sexual relationship with this woman” гэж улс даяараа мэдэгдсэн нь ард нийтийн санаа бодлыг төөрөгдүүлэх мэдэгдлийг санаатайгаар хийсэн гэж үзсэн. Секс гэдэг үгийн тодорхойлолт аман сексийг бэлгийн харилцаа гэж үзэхгүй байхаар утгачилсан байдаг(http://en.wikipedia.org/wiki/Sexual_intercourse) тул Клинтон мэдэгдэл хийж байхдаа үнэн хэлсэн, иймд хууль зөрчөөгүй. Тэгвэл яагаад Клинтонд итгэл үзүүлэх эсэх талаар ард нийтийн санал асуулга явуулсан бэ? Яагаад гэвэл гэр бүлтэй хүн гэр бүлээ хууран мэхэлж чадаж байгаа учраас тэр.  Иймд “Хууль зөрчөөгүй л бол зөв” гэдэг тайлбар нь бүх зүйлийг зөвтгөх боломжгүй юм.

Хамт ажилладаг залуу хэдэн жилийн өмнө “Монголчууд бүгд хулгайч сэтгэхүйтэй” гээд тэрийгээ маш энгийн жишээгээр нотолсон юм. Манай ажлын үүдэнд “Эргэхийг хориглоно” тэмдэг байдаг бөгөөд цагдаа байгаа өдрүүдэд жолооч нар эргэдэггүй, тийм учраас түгжрэл үүсдэггүй. Харин цагдаа байхгүй өдрүүдэд бол түгжрээтэй, бөөн сигнаал, дуу чимээ. Т-ын дэвшүүлж буй постулат нь “Хэрэвзээ цагдаа байхгүй бол хориглосон үйлдэл хийж болно гэж сэтгэж байгаа учир хүн хараагүй бол хулгай хийж болно гэж сэтгэнэ. Тийм болохоор бид хулгайч сэтгэхүйтэй”. Нээрээ бодоод байсан шар гэрэл дээр зогсолгүй зүтгээд уулзварт улаанар ороод цагдаад баригдаастай, торгуулаастай, авилгач замын цагдааг хараагаастай. Хэрэвзээ шар дээрээ зогссон бол торгуулахгүй, цагдаад мөнгө хийх боломж олдохгүй. Сайндаа л арын машинууд сигналдана биз. Гэвч чи авилга өгөөгүй, тийм болохоор нэг өдөр ч гэсэн авилгаас ангид.

ADS 2012-т шалгарсан хүний зөвлөгөө

Цаг заваа гаргаж мэдээлэл бичсэн Г-д баярлалаа. Ингээд мэддэг мэддэгээ бичээд байвал тэтгэлэг гэдэг чинь тийм ч хэцүү зүйл биш шүү дээ.

Та бүхэнд өчүүхэн ч атугай мэдээлэл болох болов уу гэж бичлээ. Би ЭйДиЭс 2012 хөтөлбөрт Категори 2 с өмнөх жил өрсөлдөж шалгарсан юм. Одоо Англи хэлний сургалтанд сууж байгаа. 7 сард Айлтс ийн шалгалтаа өгөөд оноогоо авчихвал 1 сард Австрали явна. Үнэнийг хэлэхэд энэ тэтгэлэгт өмнө нь материалаа өгч байгаагүй, энэ тэтгэлэгээр өмнө нь явж байсан таньдаг хүн байхгүй бол асууж лавлах зүйл их гардаг юмаа. Тэр болгон бүх юмаа МАСП с асуугаад байх хэцүү. 2013 ийн өргөдлийг 5.06 нд буюу маргааш аваад дуусах юм байна лээ. Материалуудаа бүрдүүлээд бүгдийг нь 4 хувь копидоод авайчиж өгнө. НД ийн дэвтрийн хуулбар л байхад болно.

Миний түрүү жил бүрдүүлсэн материалууд
1. Компанийн захирлын захидал Англи орчуулгатайгаа. энэ хүнийг тэтгэлэгт хөтөлбөрт өргөдөл өгөхөд нь дэмжиж байна. Манай сайн ажилтан ийм ийм ажил хийж байсан цаашдаа манай байгууллагын тэр зорилгод өөрийн хувь нэмрээ тэгэж оруулах ажилтан гэсэн утгатай. Зөвхөн захирал биш шууд удирддаг албаны даргаасаа бас авч болно. Тэтгэлэг авахад нь дэмжиж өгнө үү гэсэн өгүүлбэр оруулаагүй. Тэртэй тэргүй захирал нөлөөлөх боломжгүй учраас.
2. Анх ажилд орсон тушаалын хуулбар орчууlгын хамт
3. НД ын дэвтрийн хуулбар орчуулгын хамт
4. Expression of interest
5. Action plan энэ хамгийн чухал хэсэг. 1 с 2 нүүр орчим байхалд болно. Бичихдээ энэ хөтөлбөрийн зорилго болон албан байгууллагын зорилгодоо нийцүүлж бичих хэрэгтэй. Энэ хөтөлбөрт орсноор хувь хүнийхээ хэвьд би ийм зорилгодоо хзрнэ. Манай байгууллагын хэрэгжүүлж буй энэ хөтөлбөрт би ингэж хувь нэмрээ оруулна. Цаашлаад улс орныхоо хөгжил дэвшилд ийм хэрэгтэй гээд л хоорондоо уялдаатай байхаар сайн бодож бичих хэрэгтэй. Категори 2 с өрсөлдөж байгаа хүмүүст мэргэжлүүдийг нь заагаад өгчихсөн байдаг учраас тэр мэргэжлүүдээс өөртөө хамгийн ойрхон тохирохыг нь сонгоод тэрэнтэйгээ бас уялдуулах хэрэгтэй. Хэрэв огт өөр мэргэжлээр төгссөн огт өөр чиглэлээр ажиллаж байгаа бол ер нь бараг шансгүй л гэсэн үг.

6. Иргэний үнэмлэхний хуулбар.

Өмнөх жил 550 гаруй хүн энэ хөтөлбөрт өрсөлдсөн гэж сонссон. Үүнээс 400 гаруй нь зөвхөн категори 2 т өрсөлдсөн юм шиг байна лээ. 7 хуваарь байж байгаад ерөнхий сайд Австралид айлчилсны дараа хуваарийн тоо нь 17 болсон. Категори 2 маш өрсөлдөөнтэй байдаг. Гэхдээ энэ жил хуваарийн тоо их байгаа тул өмнөх жилүүдийг бодвол том боломж өгч байна гэж бодож байна.
Шалгаруулалт нь харин маш шударга явагддаг. 5 хүн ширээ тойрч сууж байгаад тус бүрдээ оноо өгөөд 5 хүн зэрэг сайн оноо өгсөн тохиолдолд шалгаруулдаг. Хэрэв аль нэг хүн нь хэтэрхий сайн юм уу муу оноо өгвөл яагаад гэдгээ тайлбарладаг гэсэн. Их л бодож тал талаас нь ярилцаж шүүдэг юм шиг байна лээ. Мэргэжлүүдийг нь маш тэгш тэнцүү хуваарилах жендер талаас нь бас бодох хэтэрхий их эмэгтэй эсвэл хэтэрхий их эмэгтэй, нэг мэргэжлээр олон хүн байлгахгүй ч гэдэг юм уу тиймэрхүү баланслах ажиллагаа бас явагдана.Сүүлийн үед Инженерийн чиглэлээр явж байгаа оюутнуудыг их дэмжиж байгаа. Одоо АЙЛТС ийн бэлтгэлд энд явагдаж байгаа сургалтанд манай ангид сурч байгаа категори 2 ийн оюутнуудаас 4 хүн public health, 3 ч хүн хүний эрх, 1 хүн жендер судлал, 1 хүн нанотехнологи, 1 хүн уул уурхай, 1 хүн байгалийн гамшиг г. м мэргэжлүүдийг сонгосон байна лээ. За ингээд зарим нэгэн зүйлийг мартсан байж магад. Бүгдэд нь амжилт хүсье. Энэ хөтөлбөр миний хувьд Монголд байгаа хөтөлбөрүүдээс хамгийн боломж ихтэй хөтөлбөр шиг санагддаг. Шалгарсны дараа Австрали явахдаа гэр бүлийн бүх хүмүүсээ авч явж болно. Зөвхөн сургалтын тэтгэлэгээс гадна сар бүр амьжиргааны зардалд нь зориулж 1500 орчим австрали доллар өгнө. Дунд сургуульд хүүхэд нь төлбөргүй сурна. Гэр бүлийн хүн нь цагийн хязгааргүй ажиллах эрхтэй гээд л . Бүгдэд нь амжилт хүсье.

Publicity stunt

Олон нийтийн масс хэрэгслээр тархи угаах ажиллагаа үнэн боловсронгуй шатанд гарчээ. Авьяаслаг Британчууд шоуны финалд үлдсэн нэг дуулаач нь аль 2009 оноос хойш ОД болохоор чармайж байгаа нөхөр байгаад энэ нөхрийг ОД болгохын тулд уг шоуны энэ бүлэгт оролцуулан түрүүлүүлэх ажиллагаа явсан болохыг өрсөлдөгч хөгжмийн продакшн нь блогоор дэлгээд уг шоуны рэйтинг унааский. Үүнтэй яг ижил нэвтрүүлгээр “Монгол эр хүн болохоор уйлдаггүй” нэг өвөрлөгч хүүг Бүх Хятадын ТВ-ээр дуулуулж, хамаг амьтны сэтгэлийг уяраав. Гэтэл Өвөр Монголд нүүрсний тэрэг бэлчээрээ хамгаалсан малчинг дайрсан хэрэг мандаж, жагсаал, цуглаан онцгой байдал зарлахдаа хүрээд байгаа бөгөөд энэ клипийг үзэж байхдаа тохиолдол уу, зохион байгуулалттай зүйл үү гэдэг асуулт миний толгойд эргэлдэж байлаа.

Дэд ерөнхийлөгчид нэр дэвшиж байсан Сара Палин өнгөрдөг долоо хоногт Нэг үндэстэн автобусаараа сурвалжлагч нартай муур, хулгана болж тоглон сайхан ПиАрдав. Энэ мужийн сангийн сайд нэг нөхөр өнгөрсөн жил шөнө явж байгаад зодуулсан гээд ард түмнээрээ өрөвдүүлээд байсан. Яг тэр аргаараа нэр хүндээ өсгөхөөр 4 сард бас нэг хүнд зодуулсан гээл ТВ-ээр гарав. Зодсон гэх этгээд нь өөрөө очиж мэдүүлэг өгөөд хэрэг явдлыг ухаад байсан улс төрч өөрөө болдоггүй, өдөөн хатгасан болж таараад нэр хүнд нь навс унав.

Манай улс төрчдийн хувьд “Дуусдаггүй ярилцлага” нэвтрүүлэгт орж, огт судлаагүй, мэддэггүй сэдвээрээ ТОМ ТОМ бүлтрэх, эсхүл хоолны нэвтрүүлэгт орж ориг бантан хийж үзүүлэх, бүүр болохгүй бол ТВ голлож булга, минжин дээл өмсөж байгаад Юндэн гөөгөөг караокэдэх гэх мэтээс хэтрэхгүй юм. Тийм болохоор хөгжингүй орнуудын зохион байгуулалттай ПиАрыг бодвол бараг “ичмээр дамжиг” юм дөө. 2008 оны сонгуулийн үеэр нэр дэвшигч нар Далай ламтай авахуулсан “зургаа”   Хөвсгөл аймагт айл болгонд тараасан байлаа.   Хөөрхий тэр хүмүүс Далай ламын зургийг хогон дээр хаяж, галд хийж чадахгүй болохоороо хоймортоо залчихсан байж билээ. Жинхэнээсээ биш эвлүүлэг гэж хэлээд чиг нэмэргүй, тэр жирийн иргэд итгэхгүй.

Миний найз байсан алдартай дуучин хоёулаа байхдаа зүв зүгээр байснаа гурав дахь хүн өрөөнд орж ирэнгүүт шууд жүжиглэж эхэлдэг байсан нь миний дургүйг хүргээд одоо толгой дохихоос хэтрэхээ больсон доо. Манай одууд өөрсдийнхөө тухай жижиг мэдээ сонин дээр их бичүүлдэг. Өөрөө л ярьж хэлээгүй бол мэдэх боломжгүй тийм деталиуд гаргаад байхаар мэргэжлийн ПиАр компани хөлслөөд тэрийгээ арай боловсронгуй хийх хэрэгтэй ш дээ. Сонин хачин үйлдэл хийгээд л, тэрийг нь уншсан жирийн иргэн би жуумалзаж суухдаа “Муу ПиАр гэж байдаггүй” гэдэг томъёоллоор ажиллаж байгаа юм байх даа л гэж гайхдаг юм.

Ёс бус хүчирхийлэл vs Зүй ёсны хүчирхийлэл

Дүү асууж байна. “Эгчээ, ёс бус хүчирхийлэл гэж байгаа юм чинь зүй ёсны хүчирхийлэл гэж байх уу?”

ТВ 25-ын мэдээнээс болоод үүнийг асуух болсон юм байна. Хөдөө байдаг эцэгтээ хүчирхийлүүлсэн насанд хүрээгүй хүүхдийг ээжтэй нь УБ-т авчирч 3 сар байлгах “бэлэг” барьж байгаа ТББ тухай мэдээ гарчээ. Тухайн гэр бүл, бага насны хүүхдийн хувьд энэ хэрэг эмзэг асуудал. Хохирогчийн эмзэг, чадамжгүй байдлыг далимдуулан ПиАр хийж байгаа ТББ гутамшиг, тэрийг нь сурвалжлаад “ёс бус хүчирхийлэл”-ийн тухай мэдээлж байгаа сурвалжлагч илүү гутамшиг.  Сурвалжлагч нар нь сул байж, юм уншдаггүй байж гэхэд тэр редакторууд нь юу хийдэг байнаа??? Олон нийтийн мэдээллийн хэрэгслэлээр тархи, толгой угаах ажиллагаа хэрээс хэтэрч байна.

Эрхтэн дархтан эвэртэн туурайтнууд сонгогчидтойгоо уулзах, ахмадуудад хандив өргөх нтр-ээ сурвалжлуулах нь арай л ёс зүйгүй Пи Ар юм. Хувийнхаа блог, НН-дээрээ тавьдаг юм байгаа биз, ОНРТ, сонингоор нийт хэдэн төгрөгний үнэ бүхий зүйл өгөв гээл ТВ дэлгэц эзлээ л, бас нэг ядарсан хөгшнөөр сэтгэгдлийг нь яриулаал… Ой гутмаар. Мөн тухайн хүн ТВ гарах хүсэлтэй үгүйг үл харгалзан зураг авна. Гудамжинд зүгээр явж байхад зураг авснаа ДОХ-ын мэдээний титрт гаргачихдаг юм даа. 

За нөгөө үндэсний манлай үйлдвэрлэгч нар бол дэндүү. Саяхан УВС групп олон улсын шагнал авсан тухай мэдээ www.news.mn -ийн нүүр нуудаснаас лав 3 хоног салсангүй. Хэрэгтэй нийтлэл гарахаар маргааш нь алга болчихдог байж, чухам зүгээр амт чанараараа гайхагдсан архи үйлдвэрлээд тэр нь хаанахын ч юм шагнал авсан тухай мэдээгээр далд сурталчилгаа хийж, тэрийг нь энэ веб сайт хуга дэмжив.

Одоо гоё юм ярьнаа. “Хүрээний бузар булайг ухвал далай гэсэн үг. Тэгж Тамирын голын мөсийг долоох шахаж байж цуглуулсан жаахан юмаа дуусгаад яахав” (http://tulhuur.com  дээр Тунгалаг тамир МП3 форматаар байгаа) гэдэг шиг болохгүй бүтэхгүйг ярьвал дуусахгүй.

Эхний мэдээ http://ganga-cz.blogspot.com/2011/05/blog-post_31.html. Гоё доо. Оройдоо хүүхэддээ 10 минут ном уншиж өгөөд байвал үр хүүхэд чинь том болсон хойноо энэ зуршлаа мөн үр хүүхдүүддээ таниулан цаашид үе дамжин амьдралын хэв маяг болон хэвшинэ гэсэн үг.

Дараагийн мэдээ: Энэ сарын 19, 24, 25-нд Хунт нуур тоглох юм байна. Алтанхуяг бас америкчууд бүжиглэнэ гэнээ. Миний хамгийн дуртай зүйлсийн нэг учраас би очиж үзнэ.

Сүүлийн үед холбоо барьж буй хүмүүс бүгд англи хэлний оноотой байж намайг баярлуулав. Гэвч оноо нь арай л хангалтгүй байна. Дахиад нэг жил мэрийвэл оноогоо аваад бас жоохон гүрийвэл тэгээл тэтгэлэгт хүрнэ дээ. Тийм болохоор зорилгоосоо хазайлгүй тэвчээртэйхэн үзвэл болох гээд байна.

Англи хэлний оноотой хүмүүс боломжтой бол

1. Эссе (болбол англиар болохгүй бол монголоор)

2. СиВи

3. Англи хэлний оноо

Би чадвал Монголд байх хугацаандаа уулзахыг бодно. Тухайн үед нь зарлана.