Тэтгэлэг горилогсдод тусламж

Archive for 2 сар, 2011

Амь амиа бодоорой?

Шинэ долоо хоногийн мэнд хүргэе. Өмнө хийж байсан санал асуулга, блог статистикаас харахад байнгын уншигчдын тоо 170-аас хэтрэхгүй байгаа нь мэдээлэл сайн тарахгүй байна гэсэн үг. Яагаад гэвэл монголын интернет хэрэглэгч 350 мянган хүнээс гадаадад сурах, тэр дундаа хүний мөнгөөр сурах хүсэлтэй хүн 170-аас хэтрэхгүй гэвэл би лав үнэмшихгүй. Ийм учраас уншигч таньд санал тавьж байна.

Энэ 3-р сараас эхлэн сар бүр тус бүрдээ нэг уншигчийг энэ блогийн уншигч болгон элсүүлэх үйл ажиллагаанд уриалж байна. Таньд ямар ашигтай вэ гэвэл хандалтын тоо ихсэх тусам тэтгэлгийн мэдээллийг тодорхой детальчлан жишээтэй тавих болно. Логик нь хандалтын тоо ихэснэ, миний мэдээллийн чанар сайжирна, олон хүн тэтгэлэг хүртэнэ. Бусдыгаа миний өрсөлдөгч гэж харан амин хувьдаа мэдээллийг дарснаар бид улс орон, нийгмийнхээ түвшинд хөгжихгүй учраас байгаа нөөцөө зүй зохистой хувааж байж тэр хөгжил дэвшил гээчид нь хүрнэ дээ. 

Тэтгэлэг хүртсэн хүмүүсээ цааш нь тус бүр таван хүнд мэдээллээ түгээх, цаашдын арга замыг нь зааж өгөх ажилд дайчлан оруулж, шахаж шаардана. Хамаагүй ээ, өөрсдийнхөө найз нөхөд, ах дүүсээсээ эхэл. Тэгээд явцын дундаа энэ хүрээгээр хязгаарлагдах боломжгүй, даяаршсан ертөнцөд бид Монгол гэдэг бүлэг сэтгэхүйг төлөөлж байгаа тул шороон буман хүнтэй Хятад, Вьетнам, Энэтхэгээс нь түрүүлж аль болох олуулаа үүнд хүрэх хэрэгтэй гэдгийг ойлгох болно.  Бидний хувьд үүнийг л эх оронч үзэл гэх байх.

Advertisements

Тэтгэлэг хүсэх өргөдөл гаргах нь

Ямарваа тэтгэлэг хүртэхийг хүсэж буй хүмүүс дор хаяж 1 жил өөрийгөө сойно. Туршлагаас харахад 2 жил дагнан хөөцөлдөхөд ямар ч байсан нэг тийшээ тэтгэлэг аваад явж байнаа.

Австралийн ЗГ-ын тэтгэлэгт биеэ хэрхэн бэлдэх талаар хуанли гаргаж өгье. Гэхдээ энэ бол арай ч дэндүү бэлэнчлэх сэтгэлгээг хөхиүлэн дэмжиж байгаа хэрэг мөн л дөө гээд дотроо бодоостой байна.

9 сар

Ямар чиглэлээр сурахаа товлож, сургуулиа хайж эхэлнэ. www.studyinaustralia.gov.au

10-12 сар

АйЛТС өгөх бэлтгэлээ хангаж эхэлнэ.

11 сар

Сонгосон 3-аас доошгүй сургууль, хөтөлбөр рүүгээ хандаж холбоо тогтооно.

12 сард

Сургууль хөтөлбөрөө сонгож, тухайн сургуулийн босго англи хэлний оноог хангахуйцаар оноо авах бэлтгэл хийнэ Тэтгэлгийн маягтыг бөглөх ажлаа алхам алхамаар хийнэ. Тодорхойлох захиа, судалгааны тойм, СиВи, бүтээлийн жагсаалт г.м.

1 сар

АйЛТС шалгалтаа өгч, оноогоо авсан байна. Өргөдөл гаргахад шаардлагатай баримт бичгийн жагсаалтыг гаргана. www.ielts.org Эндээс хуваарь харна. Болохгүй бол Бээжин рүү очоод өгчихнө

2012 оноос эхлэн АДС, АЛА http://www.ausaid.gov.au/scholar/ala.cfm

http://www.endeavour.dest.gov.auтэтгэлгийн шалгаруулалт http://www.masp.mn дээр зарлагдана.

2 сар

Сургуулиа сонгоод өргөдөл гаргах баримт бичиг шаардлагатай бүх зүйлсээ орчуулж, нотариатлуулж бэлдэж дууссан байна.

3 сар

Өргөдөл авах хугацаа тасалбар болно.

5-6 сар эхний шалгаруулалтын хариу гарна.

Сургуулиас дараа онд нь суралцах урилга авсан байх сүүлчийн хугацаа. Баримт материалуудаа багцалж янзлан эцэслэн боловсруулж дууссан байна.

9 сар

МАСП-ын эхний англи хэлний бэлтгэл эхэлнэ.

10 сарын 15.

Индеворын хариу гарна.

11 сар

Тэтгэлэгт тэнцсэн хүмүүс визний өргөдлөө гаргаж, эрүүл мэндийн үзлэгт орно.

12 сар

Тэтгэлэгт тэнцсэн хүмүүст танилцуулга хийнэ

 

Дараа жилийн 1 сарын эхний 10 хоногт багтаж, АЛА тэтгэлэг хүртсэн хүмүүс Австралид ирэ

 

ЖИЧ: Австрали, Шинэ Зеландын хичээлийн шинэ жил 3-р сард эхэлдэг тул ихэнхи тэтгэлгийн хариу 11 сар гэхэд гарч дуусдаг бол Европ, АНУ, Канадын хичээлийн шинэ жил манайхтай төстэй учраас тэтгэлгийн шалгаруулалт 6 сар гэхэд дуусдаг. Тодорхой мэдээллийг Билгүүний блогоос http://www.bilguunu.blogspot.com/

Reference letter

Аливаа тэтгэлэгт хүсэлт гаргахад тодорхойлох захиа хэрэгтэй байдаг.

3 төрлийн тодорхойлох захиа байдаг.

1. Академик тодорхойлолт

Тухайн хувь хүний суралцах чадварыг тодорхойлох зорилготой энэхүү захиаг чиний дипломын удирдагч багш, судалгааны багийн ахлагч гэх мэт ямар нэг эрдмийн цол, зэрэгтэй хүн гаргана. Энэ захианаас гарах гол санаа нь чи өмнө хэр зэрэг сайн суралцаж байсан нийт оюутнуудтай харьцуулахад аль хавьд явсныг нийт оюутнуудын топ 5%-д орохоор сурч байсан, эсхүл нийт сайн оюутнуудын 25%-д багтана гэх мэдээр хувиар илэрхийлсэн байх нь элбэг. Дүнгийн хуудсан дээр байгаа дүнтэй бас ямар нэг байдлаар уялдсан байх ёстой. Баахан В үнэлгээтэй байж ангийн топ 5% гэвэл бас жоохон үнэмшил муутай байх.

2. Хувь хүн тодорхойлох захиа

Чамайг хэн бэ гэдгийг тэтгэлэг шалгаруулах комиссынхны нүдэнд харагдаж чихэнд сонсогттол бичигдсэн байх ёстой. За загвар өмсөгчөөр зүйрлэвэл 176 см өндөр 90-60-90 харьцаатай, тайзан дээр 600 цаг алхсан, бэлтгэл сургуулилтыг долоо хоногийн 8 өдөр хийдэг гэдэг шиг л юм байна шүү дээ. Энд явж байсан дугуйлан, хобби, цуглуулга, гэх мэт зүйлээ дурьдаж болох юм. Өөрийн хамгийн сайн найз, бас өөрийн хамгийн хүчтэй өрсөлдөгч, аав ээж, багш нараасаа аваад дундаж нь гарна.

3. Чиний амжилт, бүтээлийг тодорхойлсон захиа эсхүл ажил олгогчийн захиа

Энэ их төвөгтэй яг ийм гэж хэлж болохгүй боловч тэтгэлгийн зорилготой нийцсэн байх нь чухал.  Жишээлбэл АЛА тэтгэлэгт ТББ эсхүл даргаасаа чиний удирдан зохион байгуулсан ажил, санаачлага, нийгмийн сайн сайханд чиглэгдсэн үнэгүй хөдөлмөр эрхэлсэн байдал зэргийг бичнэ. Бүүр юм олдохгүй бол хамаатан садныхаа хэдэн хүүхдийн төрсөн өдрийг зохион байгуулж өгч байсан түүхээ бичнэ. Хэрэв аливаа үйл ажиллагаа чинь амжилтад хүрээгүй бол яагаад хүрээгүй талаараа бичиж болно. Хамгийн гол нь тэтгэлгийн зорилго хангаж чадахуйц хүн юм байна гэдгийг комисст төрүүлэх юм.

Хэдийгээр тодорхойлолт сайн боловч тэр мундаг сундагийг баталгаажуулах баримт материал хангалтгүй бол хэцүү. ТББ авч байсан талархлын бичиг, Шилдгийн шилдэг ХЗХ гэдэг цом шиг юмнуудаа сайхан зураг хөргийг нь аваад дипломыг нь орчуулаад нотариатлаад хавсаргана даа.  Хэдийгээр хувь хүнийхээ хувьд Шилдэг хүүхэд, оюутан гэх мэт хүнийг ялгаварлан ангилсан зүйлд би хувьдаа дургүй боловч тэтгэлэг хүсч буй үед эдгээр өнгөтэй цаасууд нотлох баримт болоод явчихдаг юм. Гэхдээ аль наян хэдэн оны цэцэрлэгийн шилдэг цасан охин болж байсан дипломоо хавсаргана гэсэн үг биш. Тэр олон шагналаас чинь ач холбогдол өндөртэйгээс нь сонгох нь байна. Улсын олимпиад, ТВ-ийн АХА, урт өндрийн харайлтын хорооны аварга шалгаруулах тэмцээн ч байдаг юм уу оролцож байсан бол тэр тухайгаа тодорхойлолтоо хавсаргах нь чиний нийгмийн идэвхи, өрсөлдөх чадварыг харуулах юм.

За ингээд ер нь болоод явчихаж байна гэсэн үг. Гэхдээ тэтгэлгийн зорилготой нийцэхүйцээр чамайг тодорхойлсон байх нь хамгийн чухал болохоос элдэв олимпиад, тэмцээнд тасралтгүй 10 төрүүлсэн гэдэг үзүүлэлт зөвхөн чиний академик чадварыг нотлохоос яг ямар хүн бэ гэдгийг илэрхийлэхгүй гэдгийг анхаарна. Дандаа тас онц сураад элдэв уралдаан, тэмцээнд маш сайн давхидаг боловч нийгмийн ур чадвар сул бол чиний нэр хүнд доошилно. Гэхдээ бас дандаа нийгмийн ажил хийгээд явдаг “хэнхэг” боловч сайн сураагүй бол нэгэн зэрэг олон ажил хийх чадвар сул гэж дүгнэгдэж болно. Аливаа юм хоёр талтай тул дооз, тунг нь тааруулах нь чухал юм.

Ихэнхи тохиолдолд өөрөө бичээд бэлэн зүйлээ өгч гарын үсэг зуруулах хэрэгтэй болдог тул эхлээд нилээд хэдэн хүнээс амаараа асууж байгаад голыг нь олж хараад бичээд сайн найздаа, багшдаа, нэг их сайн харилцаатай биш ч таньдаг хүндээ уншуулж саналыг нь аваад бичихэд гол нь босно. Бүүр болохгүй бол хөөрхөн царайлаг, эелдэг, даруу гэх мэт баахан тэмдэг нэр жагсааж байгаад хүмүүсээр чамд тохирохыг нь сонгуулахад гол дүр зураг гардаг.

Дараахи линкээс будаа идээрэй.

http://www.examples-help.org.uk/parts-of-speech/personality-adjectives.htm

Бас Билгүүнээс будаа идэж болно http://bilguunu.blogspot.com/2010/06/apply.html#more

Цаашид Австралид мэргэжлийн сургалтад суралцагчдын тоог нэмэгдүүлнэ.

Recognition

Бүгдээрээ сайхан шинэлцгээсэн үү. Манай үүгээр сар шинэ өргөн дэлгэр сайхан боллоо. Монгол Улсаас Австрали Улсад суугаа Элчин сайд Ц. Жамбалдорж гуай ирж, Өмнөд Австралийн монголчуудтай сар шинийн баяр тэмдэглэв.http://www.canberra.mfat.gov.mn/ 

Элчин сайдтай хийсэн уулзалт, ярианаас дараахи мэдээллүүдийг олж авлаа.

Ерөнхий сайд С. Батболд ойрын үед шадар сайд нараа дагуулан Австрали Улсад айлчлал хийх гэж байгаа юм байна. Энэ үеэр Боловсролын сайд ирэх бөгөөд манай талаас тавих гол асуудлууд нь

1. Технологийн нарийн мэргэжлээр Австралид бакалаврт оюутан тэтгэлгээр сургах асуудал

2. Цашид Австралид тэтгэлгээр суралцагчдын тоог нэмэгдүүлэх,  ялангуяа мэргэжлийн сургалт, диплом, адвансд дипломын сургалтад олон хүн хамруулах

3. Нарийн мэргэжлийн ажилчдыг дадлагажуулах ажил.

Та бүхэн бүгд мэдэж байгаа. Тэтгэлгээр суралцагчдын ихэнхи нь нийгмийн ухаан, менежментийнхэн болсон. Яагаад гэхээр эдгээр хүүхдүүд шинжлэх ухаан, технологийнхнийгоо бодвол хэл сайтай байдаг тул аливаа тэтгэлгийн гол шалгуур болох АйЭЛТС-ийн 6.5 оноог түрүүлж авдаг.

2009 онд замаасаа “бултдаг” С. Баяр Ерөнхий сайдын айлчлалын үеэр энэ асуудлыг манай Австралид төгсөгчдийн холбооноос  тавьж байсан бөгөөд ажил хэрэг болж байгаад нь би хувьдаа их баяртай байна. Тийм болохоор шинээр эхлэх МАСП хөтөлбөрийн хүрээнд хүний нөөцийн чиглэлд нь өөрчлөлт орох байх гэж бодож байна.

Иймд гадаадад сурмаар байгаа хүмүүс, үүний дотор дараахи мэргэжлийнхэн Австралид суралцах боломж өндөрсөх нь байна шүү.

1. Уул уурхайн инженер, техникийн ажилтан. Өнөөдрийн байдлаар Өмнөд Шинэ Вэлс мужийн амбан захирагчийн тэтгэлгээр хоёр хүүхэд Сиднейд бакалаврт сурч байгаа юм байна.

2. Үйлдвэрлэлийн аюулгүй ажиллагаа, технологич

3. Байгаль орчны нөхөн сэргээлт, газар зохион байгуулалт

4.  Гагнуурчин, цахилгаанчин, кранчин,

5. Хүнд машин механизм, уул уурхайн тоног төхөөрөмжийн засварчин, техникч

Үүний дараа хүнс, хүнсний аюулгүй байдлын асуудал дэлхий дахинд чухлаар тавигдаж байгаа тул

6. Хүнс, хөдөө аж ахуйн бүтээгдэхүүний технологи

7. Хүлэмжийн тариалалт. (Энэ юуг хэлээд байгааг дараа сайн тайлбарланаа)

8. Загас, шувуу, тахиа, гахай, туулай г.м тэжээвэр амьтны аж ахуй

9. Малын эмч, үржил селекц, дархжаалуулалт,

10. Ургамал судлаач, селекц

Үүнийгээ дагаад биологи, химийн технологийн мэргэжилтнүүд (микробиолог,биохими г.м), лаборант, техникчид маш их хэрэгтэй болохнээ.

Хэдийгээр яг дээрхи мэргэжлээр суралцаагүй боловч хөрвөх боломжтой мэргэжлээр төгссөн, суралцаж буй хүмүүст илүү боломж байх бөгөөд хамгийн чухал англи хэлний шалгуурыг хангасан байх явдал юм. Мөн өмнө нь өөр мэргэжлээр дээд сургууль төгссөн, гэхдээ дээрхи мэргэжлээр суралцах сонирхолтой хүүхдүүдэд бас боломж байна. Хамгийн гол нь эссе дээрээ үүнийгээ сайн гаргах хэрэгтэй юм.

Өмнө тавигдсан “Ямар мэргэжлээр суралцах вэ” мөн “Австралид суралцах боломж” презентацуудыг эргүүлээд нэг харчихаарай, хүүхээд. Тэтгэлэх хүртэх магадлалтай мэргэжлийн чиглэлүүд тов тодорхой байгаа.

Энэ постын дор гарах асуултад уйгагүй хариулах болно.

Зургийн тайлбар.

Манай хотын цагаан сарын арга хэмжээн дээр бар жилийн Аделайд хотын онцлох үйл явдлаар энэ блогийг тодруулж  “With compliments to Alimaa’s Cyber Space for its positive contribution to future of young people. Adelaide. 2011″  гэсэн цомоор шагнасан шүү. Хурай, хурай, хурай. 🙂

Давхар баярын мэнд

Бүхий олон блогчиддоо сар шинийн  болон монголын багш нарын баярын өдрийн мэндийг хүргэе!

PS: Хүргэе гэж бичдэг бил үү, хүрэгъе гэж бичдэг бил үү?

Байгалийн гамшиг-Natural disaster

Куинсланд мужийн аялал жуулчлалын бүс нутгаар Яси нэртэй далайн хар салхи “айлчлах” тул “угтан авах” бэлтгэл ажил маш сайн хийгдэж байна. Хоёр хоногийн өмнөөс анхааруулж эхэлсэн бөгөөд тус газарт амьдардаг гадаадын иргэд рүү Элчин сайдын яамнаас нь аюулгүй байдлаа хангахыг анхааруулсан захидлууд дараалан очиж байна гэнэ. (Манай Элчин яам сураггүй ээ). Мөн ТВ, гар утсаар дохио хангинаастай, байдал түгшүүртэй байгаа юм байна.

Хэдийгээр манай улсад далайн хар салхи, шуурга болдоггүй ч гэсэн хаврын цагт хүчтэй цасан болон шороон шуурга тогтмол шуурдаг. Манай цаг уурчид малчдад анхааруулга сайн өгдөг. Харин хотынхонд байгалийн гамшигт үзэгдлийн үед амь нас, эд хөрөнгөө хэрхэн хохирол багатай авч гарах талаар зөвлөж байхыг нь сонсоогүй юм байна. Онцгойгийнхон хэлдэг байж магадгүй. Веб дээр нь лав энэ талаар юм алга. Юмыг яаж мэдэхэв гээд энэ үед ямар арга хэмжээ авбал зохилтой талаар сонссон дуулснаасаа хуваалцъя. Авч буй арга хэмжээний хамгийн гол зорилго нь нэвт салхилалтыг аль болох багасгах, салхины хүчнээс үүсэх эвдрэл, гэмтэл, гал авалцахаас урьдчилан сэргийлэх явдал юм.

1. Цонхондоо хэрээс гарган скоч наах. Цонхоо ингэж бэхжүүлвэл хагарах нь бага хагарсан ч шил нь бутарч унаж, нэвт салхилахаас сэргийлдэг. Хөшгөө хаах.

2. Шүүгээ, шкафны хаалгыг хооронд нь уяж, бэхлэх. Шүүгээний нүдийг онгойхоос сэргийлж скочдох

3. Гадаа ил хийсч ирээд цонхыг чинь хагалчихаар дэл сул жижиг зүйл байвал зайлуулах

4. Цахилгаан хэрэгслүүдийг розеткнээс нь салгах. Цахилгааны шийтээ бүрмөсөн унтраах

5. Хоорондоо зай завсартай эдлэл хэрэгслүүдийн хооронд орны даавуу, хувцас, зөөлөн тоглоом г.м чигжих. Энэ нь савлалтын хүчнээс болж хоорондоо үрэгдэж эвдрэхээс сэргийлнэ. Мөн өлгөж тогтоосон хүнд тавилгын доор бэхэлгээ зөөлөвч хийх, унасан ч аль болох хохирол багатай байхуйцаар арга хэмжээ авах

6. ТВ-ээ шалан дээр буулган зөөлөн буйданд нүүрээр нь тулгаж тавих. Тогтвортой муутай овор, жин ихтэй зүйлсийг аль болох булан руу шахах, шалан дээр буулгах

7. Өрөөнүүдийн хаалгыг сайтар хааж, хаалга савахаас сэргийлэх арга хэмжээ авах

8. Уг газраас дайжих боломжгүй бол ариун цэврийн өрөөндөө орж амь хоргодох.

Ер нь болзошгүй тохиолдол гээд гэртээ гар чийдэн, эмнэлгийн анхны тусламж үзүүлэх хайрцаг г.м-ийг гарын дор байлгах хэрэгтэй юм. Мөн чухал баримт бичгээ нэг дор байлгаж шууд аваад гарахад бэлэн байвал секундээр тоологдох онцгой үед хамгийн чухал зүйл. Өмнө газар хөдлөлтийн үед авах арга хэмжээний талаар бичиж байсныг эндээс уншина уу.

https://alimaa.wordpress.com/?s=%D0%93%D0%B0%D0%B7%D0%B0%D1%80+%D1%85%D3%A9%D0%B4%D0%BB%D3%A9%D0%BB%D1%82

Байгалийн хүчний өмнө хүмүүн бид хүчин мөхөс боловч урьдчилан бэлтгэлтэй байвал хохирол төдий чинээгээр багасна.

Шошгон цуваа